+0 به یه ن
یكی از بهترین شعرهای استاد كریمی كه حالت مناظره مانند دارد
و نوعی توجه به جهان اخرت و اون دنیا با حالت طنز و شعر بیان شده است
عزرائیل
منی مامور ایلیوب خالق سبحان حــاج آقا
قبض روح ایتماقا گلدیم سنی الان حـاج آقا
ویردی مستنطق رحلت منه فرمان حـاج آقا
وقت قورتاردی نفس چكماقا قادر دگوسن
آلورام جانیوی سس چكماقا قادر دگسن
جواب مریض
آی علی آی ولی آی وای دورن اوغلان ایاقا
كیمدی بو بی ادبانه بیله گیردی اطاقا
بو صفتده بشر اولماز باشی بنزیر بالاقا
نه سلام ایتدی نه تعظیم عجب هیوره دی
چاتدادی باغریم اماندی بونه بد منظره دی
عزرائیل
كیشی قشقیرما علی یا ولی گورمزله منی
منه مردم ملك الموت دیللر علنی
گلمیشم من آپارام محضر معبوده سنی
داخی بوندان بویانا بیر كسه آمر دگوسن
وقت قورتاردی نفس چكماقا قادر دگوسن
مریض
منی عفو ایله داداش بیلمدیم عزرائیل سن
شكر لله سن اوزون بیر ملك كامل سن
خدمتون فرضیدی پیك ملك عادل سن
اوتی بیر چای گتورسونلر هله تعجیل ایلمه
صبر هر ایشده گوزلدور بیله تعجیل ایلمه
عزرائیل
كیشی اوخشاتما منی قونشووز عبدالكریمه
من بو دنیا سولارین ایچمرم افسانه دیمه
من طلبكار دگولم چوخ دیله توتما سریمه
چوخ قالورسان هله بو دیللره ماهر دگوسن
وقت قورتاردی نفس چكماقا قادر دگوسن
مریض
سنه بنزر بیری گلمیشدی بیر آز بوندان ازل
چوخ خوش اخلاق صداقتلی نظافتلی گوزل
كیمیمیش او سنه قربان اولوم ای پیك اجل؟
نه دیوم عینا اونون باشی سنون باشیودی
بولمرم اوغـلویدی یا بالا قارداشیویدی
عزرائیل
عمو دكتوردی او ، اوغلوم دگی ، یولداشدی منه
قبض روح ایتماقا یولداش ندی قارداشدی منه
خیلی ماهردی بو ایشده آتادان باشدی منه
گوردوم اما سن اونا قوشمالی خاسر دگوسن
وقت قورتاردی نفس چكماقا قادر دگوسن
مریض
دوزدی مامور ایلیوبدور سنی خلاق كریم
بلكه سن سهو ایلیوبسن او دیه ن من دگلم
هله مندن قوجلار وار نه روادور من ئولم
گرچه زحمتدی قیت بیر سوروش اوندان صورا گل
آدیمی شغلیمی گیت بیر سوروش اوندان صورا گل
عزرائیل
كـیشی آغـریتدی منیم باشیمی بو طول كلام
اللی میـن ایل جان آلان سهو ایلمز اولما عوام
عمـووی عمــه وی اجدادیوی بیر بیر تانیرام
سن مگر مصطفی خان اوغلی مظاهر دگیسن؟
وقـت قورتـاردی نفس چكماقا قادر دگوسن
مریض
من دیدیم اوغلومی داماد ایدرم اتمه میشم
مشهـده كرب وبـلایه گیدرم گیـتمه میشم
تومنی بیر قـرانا ویـر مـاقی تركیدممیشم
هـــله آغـزیم منیم ایستور تازاجا آشه یته
دگول انصاف بو تئز لقدا باشیم داشه داشه یته
هله اگلش من ئولوم هر نه سورسن گتیسین
منقل حاضردی اگر نشئه چكر سن گتیسین
آبجوی پیپسی كولا كنیاك ایچرسن گتیسین
مندن اوچ یوز تومن آل ویر منه مهلت ایكی ایل
باشا باش ایـلیوم آســوده عبـادت ایكی ایل
عزرائیل
كیشی سارساخلاما نشئه ندی تریاك ندی
آبجو نمندی ایشك كیشی كنیاك ندی
قانمیوبسان هله مردار ندور پاك ندی
قانماسان چون ایله بیر فاسق فاجر دگوسن
وقت قورتاردی نفس چكماقا قادر دگوسن
من او مــامور اداره دگــولم رشـوه ییم
بش تومن پولدان اتور بیر كسی بدبخت ایلیم
بله آســوده اوزانما عـمو مــن گتمه لیم
ناقصون واردی مگر گیتماقا حاضر دگوسن
وقت قورتاردی نفس چكماقا قادر دگوسن
مریض
ناقصیم چوخدی عزیزیم اولا مــشگلدی تمام
سن گیدوب بنده دن عرض ایله خداونده سلام
اوزی انصاف ایلسون وار ایكی اوچ خردا بالام
هـــله من تازه جوانم ایله گون گورمه مشم
دنیادان دویمامشام بیر ایله كیف سورمه میشم
عزرائیل
كیمدی ایشك كیشی غلمان ویره یا حور سنه
حـوری معروفه دگول كه بـاش اگه هر گلنه
سوخاجاق مالـك دوزخ گـتووه اودلی شنه
غـرق سن معصیته طیب و طاهر دگوسن
وقت قورتاردی نفس چكماقا قادر دگوسن
مریض
دیمه لی ماك دوزخده تیكـوب گوز یولـوما
گور بو الله نچه مامور دوزوب صـاق صولوما
بیر نـفر اینجینده بولـمز منی منـت پولوما
پولونان مالك نیرانیده آرام ایدرم
گیدرم جنته حوریلریده رام ایدرم
عزرائیل
داخی بوندان صورا مالك دگیسن اوز پولووا
گـورسن اهـل عیالون دوزلوب صاق صولوا
ییه جاقلار ، ایچه جاقلار، سچاجاقلار یالووا
بو ایوین دخلینه یاخرجینه ناظر دگوسن
وقت قورتاردی نفس چكماقا قادر دگوسن
ایش اورا ایتدی ایو اهلی هاموسی آغلادیـلار
حاجینین دستمالینان گوزلرینی باغلادیــلار
بعضی قاچدی كفنه بعضیسی سو داغلادیــلار
دست قدرت حاجینون تختینی تابوت ایلدی
ناز پـرور بدنین جانـوره قـوت ایـلدی
دعوا باشلاندی مال اوسته حاجینون وای حالنا
باجی قـارداشه دیـور :ده ده ویــن سقالنا
كــوره كن گه یالـنا سـچار گـهی یوپالینا
نچه گوندن صورا ارواد گیدوب اوزگه اره
بیر نفر گـلدی تصاحـب ایلدی سیم وزره
خوش اوشخصه اوزی اعمالینی اصلاح ایلیه
ارجعی لفظین ایشید جك اوزی لبیك دیه
خــلعت آخرتی اگـنینه عــزتله گـیه
روبر اولدی همان لحظه كه عزرائیلیلن
گوله عزرائیلی گورجك آلا جانین گلیلن
اگه بونان سنین خوشین گلدی منه پیقام یاز گنان
گؤنده ر
بؤلوم لر: