+0 به یه ن
ویردون ای چرخ ندن فرصتی اشرار الینه
رشته‌ی كار گچوب مرد تبه‌كار الینه
نه روا بلبل او ذوقیله قفسده یاشیا
گل او اندازه لطافتله دوشه خار الینه
حكم زندان ویریله یوسفه تقوایه گوره
مصر قبضه اولا بیر حاكم جبّار الینه
سن مگر ساحریدون رمز طلسماتیله
قورخیدان تاپشوراسان گنجی سیه مار الینه
نه صلاحیله امیر ایتدون عبیداللهی
ویرر عاقل نجه قدّاره‌نی غدّار الینه
وریلا سكّه‌ی اسلام یزیدون آدینا
ویریله سنگر دین شارب و خمّار الینه
اختیارات آلنا صاحب تقوادن اگر
تاپشوراللار سر یحیانی زناكار الینه
بیعت ایتمز ابی‌عبدالله عبیداللهه
ساربان ظلمینی هر چند ایده تكرار الینه
یتشوب جاه و مقامه هامی قدّاره‌كشان
بنده‌لر بند چكوب زبده‌ی احرار الینه
حكمتیلن بیر ایشون اولدی پسندیده فقط
ذوالفقار ارث یتشدی شه ابرار الینه
گرچه دورد اوغلی ئولوب آلتی جوان قارداشی
آز قالور عترتی مقهور اولا اغیار الینه
ئوزی تك دوره‌سی دشمن اوره‌گی داغلی سوسوز
بیر نفر یوخ ویره ال حقّه طرفدار الینه
باشینون اوسته حرارت ایاقی آلتدا غبار
دورت طرف دشمن آلوب نیزه‌ی خونخوار الینه
سوونوللر اوقدر عرصه‌ده یالقزلقنا
سانكه درّنده سالوب طعمه‌ی پروار الینه
بله فكر ایلدیلر ضعف دوتوب اندامین
زنده تسلیم اولاجاق لشگر جرّار الینه
ذوالجناح اوسته دوزلتدی بوكولن قدّین امام
صف‌لره باخدی گله نقشه‌ی پیكار الینه
دیدی لشگر سیزی اوچ امره مخیّر ایدورم
بو اوچوندن بیرینی تاپشرون اقرا الینه
یا قویون باش گوتوروم قورخلی قزلاریملن
یوز قویوم چوللره باش ویرمیوم اشرار الینه
یا بیر آز سو ویرون اوّل منه یاندی جگریم
آنادان ارثدی سو عترت اطهار الینه
یا اگر یوخدی سیزون جنگدن آیری هدفوز
كمگیم یوخدی منیم گوزتیكم انصار الینه
من تكم جنگیمه تك تك گلون ای قوم شریر
تا ویریم هر نفرون باطله طومار الینه
تن به تن جنگی قبول ایتدی فقط سعد اوغلی
ئوزیده قیلدی تماشا گله معیار الینه
بیر یزید آدلی كیشی ابطحی شهرت ملعون
چخدی صفدن آلوب ئوز جانینی مردار الینه
آچدی آغزین دیه‌سن كه آچلوب قبر یزید
سبقت ایتدی نجس آغزیندا كی گفتار الینه
ناسزا باشلادی مردان سزاوار حقه
ناقه‌ی عسگر شیطان ویروب افسار الینه
مركب كفره ایدوب عایشه‌ی نفسی سوار
تاپشروب عهد رسول‌اللهی انكار الینه
ساق ركابندن ایاقین چخادوب بی‌كس امام
صول ركاب اوسته سالوب لنگر بسیار الینه
ئوزی بیر فنّ‌دی بو، كیم صولا لنگر سالسا
ساق طرفدن یغشار قدرت سرشار الینه
بیر قلج وردی او نامرده بو كیفیتلن
اولدی جبریل امین صدقیله زوّار الینه
دیدی ظالم منی سن اولما آدامسیز گوردون
ویرمرم لحظه امان یوز بِله كفّار الینه
زور بازوی ولایت هله سربسته قالوب
ذوالفقار آلمامشام خالق قهار الینه
آستینمدن اگر دست ولایت چخادام
یتمز ئوز پیكریمون زحمت و آزار الینه
بیر نفر زنده قوتارماز آپارا شهره خبر
كوفه‌دن ابن زیادون ویره آمار الینه
الغرض بیر بِله اخطار و نصیحتله گنه
اولدی بیر آیری مبارزده گرفتار الینه
اونادا وردی صولوندان افقی بیر شمشیر
باشی لعنت اوخودی گویده طمع‌كار الینه
گلدی بیر بیر واریدی كیمده بیر آز باد دماغ
دگمدی قانلاریدا حجت دادار الینه
ذوالفقار ایتدی عجب قابض الارواحه كمك
باشلاری یوللادی پیشواز ایده همكار الینه
گچدی صف‌لر دالنا فارس و شجعان عرب
شمر آلوب ریش عمر سعدی بَرَص‌دار الینه
دیدی بو جنگی قبول ایلدون آخر نیه‌سن
زُبده سركرده‌لریم یاندی شرربار الینه
دیدی من فكر ایلدیم اوغلی ئولنلن طرفم
شیر غضبان قوجالان وقته نه زنهار الینه
قویمادوز كعبه‌ده ایتسون اونی رمی جمره
ایندی باشلاری یغور داش كیمی فخّاز الینه
ورار اعدا باشینی داش یرینه ابلیسه
حجّی تكمیل اولاجان تاپشورا دلدار الینه
حمله فرمانی ویریم ایندی بو سایسیز قوشونا
فتنه‌دن بند چكیم حیدر كرار الینه
نهر علقم طرفین خالی ایدون معركیه
باغلیوم حیله طنابین بو فداكار الینه
بو غریبون یولی دوشسه سو كناریندن اگر
قوللاری سست اولاجاق باخسا علمدار الینه
شمر سسلندی بو روشن‌دی كه ذی‌الجوشن آتام
مكریده باش گلر ابلیسون او مكّار الینه
بو شهون قولارینی باغلاسا زینب باغلار
زینبون ناله‌سی فوراً ایدر اخطار الینه
من ئوزوم خیمه‌لرین دوره‌لیوم سیزده ئوزین
ویرمیك مهلت اونون صاعقه رفتار الینه
وردیلار طبل یورش یوزمین عدوّ اللهه
آلدی هر كس گنه بیر زهریلی ابزار الینه
باش آچوب فاطمه صدقیله ایدوب راز و نیاز
بو غریب اوغلومون الله ئوزون اول یار الینه
ذوالجناح اولدی فقط یالقز امامون كمكی
اللرین قوزادی سبقت ایده سالار الینه
قولاقین شهلدی بیر شیحه چكوب قزدی گوزی
راكب و مركب ایدوب حمله كماندار الینه
صف اوّلده تلف ایتدیله یتمیش نفری
صف دوّمده اولوب قرخی گرفتار الینه
قاچاقاچ دوشدی صف چارمی سوّم یخدی
صف پنجمده شكست اولدی سزاوار الینه
بو هیاهوده یتوب خیمیه شمرون قشونی
ساچلارین آلدی گنه خیمه‌ده قزلار الینه
قولی سست اولدی امامون چكوب ال دعوادن
زینبون آلدی سسین اولدی نگهدار الینه
دیدی ای لشگر ناپاك ابی‌سفیانی
دینوزی ویردوز عجب درهم و دینار الینه
دین یوخوز باری جوانمرد اولون ای قوم شریر
اگمیون بوینوزی بی‌غیرت و بی‌عار الینه
منیلن جنگ ایدیسوز تا نقدر وار نفسیم
دگمسین قمچی گرگ زینب بی‌یار الینه
شمر بیر بانگ ویروب لشگر عقب‌گرد ایلدی
ایتدی تعطیل جفا حكمینی هموار الینه
دیدی بو كفوّ كریمون سوزین اجرا ایلیون
آلسون عمامه‌سینی احمد مختار الینه
او شهی دوره‌لدی مور و ملخ تك اوخ آتان
سنگ پرّانلار اگلیدی آلوب احجار الینه
سجده‌گاهندن آخوب گل یوزینه ثارالله
كوینگینون اتگین آلدی گهربار الینه
قوزانوب كوینگ اولوب داغ علی اكبر عیان
ایش دوشوب حرمله‌ی شوم و تبه‌كار الینه
دیدی اوچ‌پر اوخون اوچمینجسی‌دی شاهد اولون
ایندی قزلاری آلار زلف سمنبار الینه
او شقی‌نونده اوخین چرخ یتوردی هدفه
ایتدی ثاراللهی ایثار نگونسار الینه
سندی صندوق اولوب اسرار شهادت جاری
جنّت تجری من تحت‌الانهار الینه
دیدی لا حول و لا قوة الا بالله
یارالی باشی دوشوب شمرون او خونخوار الینه
شاعر: استاد منزوی مرحوم
گؤنده ر
بؤلوم لر:
شعر و داستان