+0 به یه ن
وئرمیشم طاقت و آرامیمی ای یار سنه
عاشیقم، عاشیقم ای دیلبر عیار سنه
سووه‌رم بزم اولا خلوت قویاسان من ائلیم
دردیمی، محنتیمی، غصه‌می اظهار سنه
گزه‌رم كوچه و دربندی دالونجا سوخارام
پیچاغی قارنینا هر كس ائده آزار سنه
ایستی وقتینده سویونسان سالارام تئز ایچینه
كاسه‌نین بوز وئره‌رم شربت گلنار سنه
گل اوتور قوزا قیچون گیدیریم ای یار عزیز
هر نه سویسن جوراب و چكمه و شلوار سنه
نیه اُوجُوندا سیخورسان، ازیسن، سیندیریسان
نیلیوب آخ بو یازیخ قلب وفادار سنه
سن یخیل بالش ناز اوسته اُوزان منده چالیم
ضرب و قارمان و كمانچه، ویالون، تار سنه
اَیمه، شاخ ساخلا یانوندا، باخوب، اوپ قوی گوزوه
بو گوزل عكسی كی مندن قالور آثار سنه
دوگمه سین آچ آرالا، ساخلا قویوم اورتاسینا
آلمیشام ساك دولوسی، حیوا، لیمو، نار سنه
عیبی یوخ اینجیمه، ویش ویش دئمه، قوی تئز چیخاردیم
سیخسا باشماخ ایاقون، اولسا اگر دار سنه
دئوز بیر آز بندین آچیم تا وئریم الان اَلیوه
چتریوی وئرمیه زحمت، بو یاغیش قار سنه
گله‌سن باغدا وئررم بیر الیوه اویناداسان
قرمزی آلما، شمامه، گل بی‌خار سنه
ال ایاخ چالما، چالیشما، نئجه توتسان كئچه جك
دئمه خاطیر قویاجاخ چرخ جفاكار سنه
احتراماً دایارام آغزوا تا سن سوراسان
سولی قلیانی، كریمی دئیر اشعار سنه
كریمی مراغه‌ای
گؤنده ر
بؤلوم لر:
میرزا كریمی مراغه ای