+0 به یه ن
ای ستمگر منی رسوای جهان ائیله میسن
گوزومون یاشینی چون دجله روان ائیله میسن
همنشین ائیله میسن دشمنی ای مایه ی ناز
رشگدن جانیم آلیب، باغریمی قان ائیله میسن
گون كیمی عارضووه زلف چلیپانی سالیب
گونی گور ابر سیه آلتدا نهان ائیله میسن
نازیله، عشوه ایله، سیر ائله ییب گلزاری
گوستریب معجزه سن سرو روان ائیله میسن
بیر جانیم وارایدی ای شوخ كی آلدین او زمان
اوزگه جان داهی بو بی كسده گمان ائیله میسن
قاشلارون تیغ ستم آلمیش اله، كیرپیگون اوخ
اولدوروبسن منی ناحق یئره قان ائیله میسن
نه اوچون ای شوخ نقابین گوتوروبسن اوزدن
روی خورشید وشی خلقه عیان ائیله میسن
آلمیسان عقلیمی سردن منیم ای آفت جان
قددیمی محنت هجرونده كمان ائیله میسن
هوس وصلویله ای مه من «حیران» ی
باشی یئرده، گوزی یولدا نگران ائیله میسن
حیران خانیم
گؤنده ر
بؤلوم لر:
آذربایجان شعرلری