اهل-ی-اخبار مقاتیلده یازێب بۇ خبری

مرغ-ی-روحین ائشیده‌ن وقته سینیر بال-وْ-پری

یاندێران سؤزدۆ سالێر رقّته قلب-ی-بشری

شام ویرانه اوْلان گۆنده ورود اُسراء

یۆز وئریب قاسیم-ی-شهزاده‌یه بیر آیرێ بلا

خط-ی-سیر-ی-اُسراء دوْلمۇشۇدۇ میللت‌‌یله

هرزه عورت‌لریله، مردُم-ی-كم همّتیله

جشنه مشغولیدی شهر اهلی نه كیفیت‌یله

گه باخۇردێلا یوْلۇن ساغینه، گاهی سوْلۇنا

گؤزلری منتظریدی اُسرانین یوْلۇنا

ناگهان شهره ورود ائیله‌دی بیر تیپ سوار

اُمراء اوّل-ی-صفده گؤرۆنۆب مست-وْ-خومار

ائتدی تشویق اوْ سركرده‌لری فرقه‌ی-ی-نار

مرحبا صوتی بلند اوْلدۇ گؤگه هر یاندان

مركب اۆسته سئوینیب فخر ائله‌دی شئمر-وْ-سنان

ازرق‌ین زوجه‌سی بیر غرفه ده ائتمیشدی مقام

اُمرانین صفینه باخدێ اوْ ناپاك حرام

گؤرمه‌دی همسر-ی-خونخوارینی تئز ائتدی قیام

اوْلدۇ آگاه اوْ ملعونه طریقت خطره

غرفه‌نین پلّه‌لرین سرعتیله ائندی یئره

اؤزۆنۆ شئمر-ی-دغایه یئتیریب آلدێ خبر

هانێ ازرق؟ هانی اوْغلانلارێم ائی منبع-ی-شر

گؤرمۆره‌م هئچ بیرینی ائیلیره‌م اطرافه نظر

اؤزلرین شامه اوْلار، فكر ائلئییردیم یئتیره‌ر

سن كیمی هر بیریسی نئیزه‌ده بیر باش گتیره‌ر

دئدی غفلتده‌ سن عورت خبرون یوْخدۇ مگه‌ر

دؤرد جاوان اوْغلۇوۇلان ارزقی ائی خاك سییه‌ر(سیر)

بیر اوْن اۆچ سیننیده اوْغلان ولی مردانه سییه‌ر

رمه‌ی-ی-روبه‌هه حمله ائله بیل شیر ائله‌دی

بیربه‌بیر ییخدی یئره طُعمه‌-ی-شمشیر ائله‌دی

دئدی عورت اؤزۆ بس نوْلدۇ اوْنۇن سؤیله منه

نئیله‌دوز سیز منیم اوْغلانلارێمی اؤلدۆره‌نی

دئدی آهۇ كیمی یێخدێق اوْنۇ دشت-وْ-دمنه

نیگه‌ران اوْلما اوْقدری، اوْنا دگمیشدی یارا

عموسی ائیلییه‌بیلمیردی خییامه آپارا

دئدی گؤسته‌ر یارالێ باشێنێ ائی هرزه روان

قاسیمین باشێن اوْنا شئمر-ی-لعین وئردی نیشان

اؤلدۆرۆبدۆر دئدی اوْغلانلارۇوۇ، باخ بۇ جاوان

یاره‌لی باشه اوْ ملعونه نظر ائتدی بیر آز

اینتیقام آلماسام الان دئدی قلبیم سوْیماز

قایێدێب منزیلینه قێزلارێنا قێلدێ خیطاب

بی‌خبرسیز بیزی بۇ جنگ ائله‌ییب خانه خراب

اینتیقامه اوْلۇن آماده دگیل موقع-ی-خواب

یۆزه گؤرمۆرسۆز آنوْز اشكینی حسره‌تله الور(الیر)

آتا قارداشلارۇزۇ اؤلدۆره‌نین باشێ گلور(گلیر)

دوْلدۇرۇن دامه‌نوزو سنگ-ی-عداوه‌تله هامۇز

پیشوازینه گئدین قصد اهانتله هامۇز

نئیزه‌نی دوْره‌لئیین فیكر-ی-خییانتله هامۇز

سنگ باران ائله‌یین باشێنێ مقصوده چاتێن

هر داشێكێ آتۇسۇز سعی ائله‌یین محكم آتۇن

یاندێرێن ظلمون اوْدیلا اُسرانین جیگه‌رین

سێندێرێن غصّه‌لی بولبول‌لرینین بال-وْ-پرین

غرق-ی-اندوه ائله‌یین خانه بئدوش عمّه‌لرین

یاره‌له‌نمیش باشێنێن نئیزه‌ده آرتسێن یاراسێ

مله‌سین ناقه-ی-نوق اۆستۆنده پریشان آناسێ

یئتیریم بۇ سؤزۆ یاربّ نئجه پرده ایله باشا

بیلمیره‌م ائتدیله حمله نئچه یاندان اوْ باشا

گؤزۆنۆ یۇمدۇ «سریه» باخا بیلمیری داشا

كیم دؤزه‌ر ایسته‌دیگین گؤز قاباغێندا وۇرالار

بالا باشێن آنانێن اؤز قاباغێندا وۇرالار

اُسرا بیربیره دگدی، ائله سخت اوْلدۇ محن

سسله‌نیب زینب-ی-كبرا باجۇن اؤلسۆن حسن

نه اوْلار، قاسیمیوی گؤرمه‌گه شامه گله‌سن

یوْخدۇ ایمداده گله‌ن فیكریمیزه سن قالاسان

اوْغلۇوۇ بۇ داش آتانلارێن الینده‌ن آلاسان

داش آتان شخص‌لرین درك ائله‌ییبدیر عمه‌لین

بوْینۇنۇ چیگنینه حسره‌تله قوْیۇب تازه گلین

قاره بختیم دئدی من بیربیرینه وۇردۇ الین

دوشمه‌نین ایندی فله‌ك گؤر نئجه قوّتلی قوْلۇن

هر طره‌فده‌ن یۆزۆمه باغلادێلار، چاره یوْلۇن

رئشته‌ی-ی-عئشقی، عم اوْغلۇ! ائله فیكر ائتمه قێرام

باشۇوۇ داشلێیالار ساكیت-وْ-آرام اوْتۇرام

توْپراغا دَیمیر الیم، باشیمه توْپراق سوْوۇرام

یانێرام اوْدلانێرام، باشۇوا ائتدیگجه نظر

پر شیكه‌سته قۇشا تشبیهه‌م الیمده‌ن نه گله‌ر؟

دؤزمیشه‌م شامه كیمی هر محنه دینمه‌میشه‌م

زجر چوْخ قمچی وۇرۇب یوْلدا منه دینمه‌میشه‌م

غرفه‌لرده‌ن باشێما كۆل تؤكه‌نه دینمه‌میشه‌م

چوْخدۇ دردیم نه روا آیرێ سیته‌م باشلێیالار

من باخێرام نئزه‌نین اۆستۆنده سنی داشلێیالار

یوسئفیم غملی زولیخایه نیشان وئر اؤزۆوی

گؤزۆمه تیره‌دی دونیا نه یۇمۇبسان گؤزۆوی

شامێن اهلی ائشیدیب اوْلما سنین توْی سؤزۆوی

اوْدۇر ایستیلله تسلّی اوْلا غم یوْلداشۇوا

داش آتێرلار سنه یا نُقل سپیرلر باشۇوا

كۆل ائدیب حیجله‌میزی آته‌شیله اهل-ی-قیتال

نه دانێشدێم سنیله، اوْلدۇ نه گوفتاره مجال

نه گلین‌لر كیمی سالدێم باشێما قێرمێزێ شال

توْی گۆنۆ تئل‌لریمی شانه‌ی-ی-محنت دارادێ

دئمیره‌م چوْخ سؤزۆ الآندا قۇلاغێم یارادێ

قوْشار: انور اردبیلی

گؤنده ر     بؤلوم لر: جناب قاسیم (حضرت قاسم (ع))